Kaha jata hai, ki adab ka asar tabhie hota hai, jab wo zindagi se juda ho. Jaun Elia ek shayar hone key sath sath, philosopher, scholar, thinker ki tarah jane jaate hain. Phir bhi ek aam aadmi Jaun ki shayari se relate kar sakta hai. Zyada metaphors nahin hain, mamooli lafzon mein, buland lehje mein, apni baat kehtey hain. Mere jaise Urdu kam padhe likhe logon ko baar baar Urdu dictionary refer nahin karni padti. 

Har umra key log Jaun ki shayari mein apni zindagi ki jhalak dekh saktey hain. Maslan, aaj kal key daur mein naujawan nasl ka ek bahot bada issue hai, break up handle karna. Jaun bade sada lafzon mein kehte hain- 

Naya ek rishta paida kyun karain hum,

bichadna hai to jhagda kyun karain hum.

Agley sher mein romance ki inteha dekhiye-

Hain daleelain tere khilaf magar,

sochta hoon teri himayat mein.

Mujhe yakeen hai, Jaun ki kaifiyat mere jaisi bilkul nahin thee jab unhone ye sher likha tha. Mujhe nahin lagta ghardari ki zimmedarian theen un par,  par mere ghar mein jab, kabhie nal tapakne lagta hai, kabhie geyser kharab ho jaata, barsaat key mausam mein darwaze ki kundi theek se band nahin hoti to mujhe Jaun yaad aate hain

Kaun is ghar ki dekhbhal karey.

roz ek cheez toot jaati hai.

Jaun ki shayari mein, attitude hai, dard bhi mehsoos kiya ja sakta hai. Jo unkey dil mein hai bagair lag lapet key unapologetically keh dete hain-

Main jo hoon, Jaun Elia hoon janab

Iska behad lihaz keejiyega.

Ek sher hai Jaun ka, jo unka dard aur attitude dono bayan karta hai-

Ilaj ye hai ki majboor kar diya jaun,

vagarna yoon to kisi ki nahin suni maine.

Ek aur sher hai Jaun ka jo mujhe behad pasand hai-

Ab to har baat yaad aati hai,

ghaliban main kisi ko bhool gaya.

Jaun Elia ki meri pasandida ghazal,  

“Beqarari Si Beqarari Hai”  Ye ghazal unki kitab Yani mein shaya hui thee-

Be-qaraari si be-qaraari hai,
wasl hai aur firaq taari hai
Jo guzaari na ja saki hum se,
hum ne woh zindagi guzaari hai
Us se kahiyo key dil ki galion mein,
raat din teri intezaari hai
Ik mehak samt-e-dil se aayi thi,
main yeh samjha teri sawaari hai
Haadson ka hisab hai apna,
warna har aan sab ki baari hai
Bin tumhare kabhi nahin aayi,
kya meri neend bhi tumhari hai
Nighare kya hue key logon par,
apna saaya bhi ab to bhaari hai
Khush rahe tu ke zindagi apni,
umra bhar ki umeed-wari hai
Hijr ho ya wisal ho kuchh ho,
hum hain aur us ki yadgaari hai.